جامعاوي في بطن الحوت

من طرف **سهيل المصري** الجمعة سبتمبر 26, 2008 4:44 pm

جامعاوي في بطن الحوت

لأنني بني آدم جبان .. جبان جدا .. متستغربوش .. أنا قصدي في ركوب المواصلات .. فأنا طول حياتي أتحرى النزول إلى الشارع في أوقات الفراغ .. استنى اللحظة اللي يكون فيها الشعب كله مشغول أو نايم .. فاستغل الفرصة .. عشان أركب المواصلات وهية فاااااااااضية ..

لذلك فقد أخذت على نفسي عهد ما أهوب نحية محطة مصر من الساعة 2 للساعة 6 .. وما أركب حاجة على طريق البحر من الساعة 8 الصبح لحد الساعة 11 ..

ما علينا .. حظي المطين .. إني مضطر إني أروح مشوار لمحطة مصر .. في أحد ساعات الخطر .. اللي بيبقى الشعب كله عايز يروح عشان يلحق ساعة الصفر عندما يضرب المدفع ويسمح للبني آدم إنه يطحن ..

قضيت مشواري .. وحانت لحظة الخطر .. ذهبت عند الموقف عشان أروح .. وفوجئت بــ .... إيه ده؟؟ إيه كل الناس دي ؟؟؟ يا نهااااار حروح إزاي ؟؟

وقبل ما أفكر في إجابة السؤال .. لاح من بعيد خيال ميكروباص جاي علينا .. ولقيت كل اللي واقفين حاطين إيدهم فوق عينيهم .. ومبرئين .. والميكروباص يقرب .. والناس تبرء .. والميكروباص يقرب .. والناس برضه تبرء .. والميكروباص يقرب .. وأنا أعيط ..

وفجاة لقيت الناس كلها .. ستات ورجالة وعيال .. كلهم نزلوا على ركبتهم اليمين .. وفردوا رجليهم الشمال لورا .. وساندين على إيديهم .. إيه يا جدعان هو في إيه؟؟! .. هو احنا في الالومبيكيات ولا إيه؟؟ أنتوا بتعملوا كده ليه؟؟ هو احنا في ماراثون؟؟

وأنا غرقان في هذا الذهول .. لقيت واحد جنبي نازل على الأرض زيهم .. بيقولي بصوت واطي: إنزل يا كابتن .. لو عايز تركب إنزل .. يا لهوي لو عايز أركب انزل !!!

نزلت جنبه ع الأرض .. وقولتله في استعطاف أقرب للشحاتة: يا حج هو أنا لو عملت زيكوا حتركبوني معاكوا ؟؟!!

فنظر إليَ نظرة المتفحلش المتحرزق ثم قال: انت عبيط يا بني .. احنا لسه هنجري .. ثم نظر إليَ نظرة خباثة وابتسم ابتسامة خباثة أيضاً ثم أردف: واللي حيكسب .. حيركب يا حلووو!!

وبعدين هو أنت أول مرة تيجـــ.. ثم قطع حوارنا الشيق صوت صرخة عالية من واحد الواضح عليه إنه مش من المتسابقين قصدي الركاب .. باين عليه إنه المدرب الفني لمحطة مصر

يااااااااااااااالللاااااا .. ياااااااااااا بشرررررر .. يالاااااااااااااااااااا

بعد انطلاق صيحة البداية .. لقيت كل البشر بيجروا .. فسألت اللي جنبي: اعمل إيه ؟؟ اعمل إيه ؟؟

- جتك نيلة أنت لسه حتسأل .. اجري .. اجري

حاولت اجري .. فعلاً حاولت ..لكن لقيت نفسي اتحشرت .. اتحشرت في مكان غريييييب .. خير اللهم اجعله خير .. قال إيه .. زي ما يكون .. غسالة وبتلف بيا .. وقال الحاج سيد جاني من بعيد وبينادي عليا: واد يا جمعاوي .. أنت ياض ..

- أيوة يا عم السيد ..

- قوم يا جمعاوي .. قوم شوف أنت عملت إيه؟؟ قوم .. واستبشر متخفش يا بني أنت حتروح بعون الله النهاردة

- بجد يا عم السيد

- أيوة يابني

- عم السيد ممكن سؤال؟؟ هو أنت مين ولا مؤاخذة؟؟

ولقيتني وأنا محشور .. مش شايف حاجة .. ولا سامع حاجة .. ولا حاسس بحاجة .. ولا شامم حاجة إلا ريحة عرق .. الله يقرفكم .. إيه الريحة دي .. محدش بيحط كولونيا

- بعد لحظات من الدفع الشعبي لقيت نفسي اتزلطت على كرسي .. بصيت حوليا يمين وشمال .. سبحان الله!! .. أنا قاعد في القطر .. يا جدعان هو احنا مش كنا بنجري على ميكروباص ..أنا إيه اللي جابني هنا .. أنا مش بحب أركب القطر

فرد أحد الركاب: إيه يا عم .. أنت حتكفر .. أحمد ربنا .. أنا إمبارح كنت بجري أركب القطر .. وفي الآخر لقيتني ركبت البوكس وشوف فين بقى لما صدقوا إني كنت عايز أركب مواصلة عشان أروح البيت وإني مش حرامي جزم في جامع زي ما قالولي .. أحمد ربنا وتتبطرش ع النعمة

فراكب تاني قاطع حديثه قائلاً: يا عمي .. ياما تحت الدلاوب مظاليم .. وياما جوة الكوميدينو ملاليم .. يا عم متحطش في دماغك .. المهم مبروك علينا يا أزاتزة المرواح

والناس اللي ملحقتش تركب القطر يا عيني .. اللي يعيط واللي يضرب كف بكف ..الراجل اللي كان جنبي قبل السباق .. نظر إليَ نظرة حقد وهو على رصيف المحطة وهو يصرخ بأعلى صوته: يا ابن المحظوظة!!

وبعد وقت طويل .. لم أجد القطر يقف عند المحطات التي اعرفها .. فسألت: يا جدعان مش ده قطر أبو قير .. اللي بيروح سيدي بشر .. قالولي: لأ .. ده رايح رشيد ..

- رشيد .. رشيد إيه؟؟ أنا مروح سيدي بشر ..

- خلاص أنزل رشيد .. واركب من رشيد معمورة ومن المعمورة أركب سيدي بشر

- هو أنا لسه حركب .. حرام عليكو!!!

- أنت ياض معوج ليه م الصبح كده ومش عاجبك حاجة .. حد لاقي .. مش كفاية ركبت وقاعد على كرسي كمان .. عيال آخر زمان .. جتكو القرف

أنهيت حواري مع زملائي الركاب قبل ما يقيموا على الحد لأني معترض أن أركب قطر رشيد وأنا أصلاً ساكن في سيدي بشر .. وروحت البيت ع السحور بعد ما لفيت الكرة الأرضية ... واقسمت بعزة جلال الله إني ما اهوب نحية محطة مصر تاني أبداااااا
م ن ق و ل

من طرف جنة الرحمن السبت سبتمبر 27, 2008 7:25 am

ههههههههههههههههههههههههههه
الله يكون في عونه وفي عوناااااااااااااا Sad

جامعاوي في بطن الحوت

جامعاوي في بطن الحوت

رد: جامعاوي في بطن الحوت